ເພື່ອເປັນການສ້າງຂະບວນການ ແລະ ຜົນງານ ຕ້ອນຮັບວັນສໍາຄັນຕ່າງໆຂອງພັກ, ຂອງຊາດ ກໍຄືວັນສ້າງຕັ້ງຊາວໜຸ່ມປະຊາຊົນ ປະຕິວັດລາວ ຄົບຮອບ 66 ປີ, ຊາວໜຸ່ມອາສາສະໝັກ ເມືອງພູວົງ ແຂວງອັດຕະປື ໄດ້ຮ່ວມແຮງຮ່ວມໃຈກັນຊ່ວຍປຸກສ້າງເຮືອນໃຫ້ປະຊາຊົນຜູ້ທຸກຍາກອານາຖາ ທີ່ບ້ານລະມອງ ເມືອງພູວົງ.
ທ່ານນາງ ສຸກສະຫັວນ ໄຊຍະບຸນຮາຍ ເລຂາຄະນະບໍລິ ຫານງານຊາວໜຸ່ມ ເມືອງພູວົງ ໄດ້ໃຫ້ລາຍລະອຽດວ່າ: ການທີ່ຊາວໜຸ່ມອາສາສະໝັກພາຍໃນເມືອງພູວົງ ໄດ້ພ້ອມໃຈກັນ ປຸກສ້າງເຮືອນຢູ່ໃຫ້ປະຊາຊົນຜູ້ທຸກຍາກອານາຖາ ຢູ່ບ້ານລະມອງຄັ້ງນີ ກໍເພື່ອເປັນການສ້າງຂະບວນການ ແລະ ຜົນງານ ຕ້ອນຮັບວັນສໍາຄັນຕ່າງທ ຂອງພັກ-ຂອງຊາດ ກໍ່ຄືຕ້ອນຮັບວັນສ້າງຕັ້ງຊາວໜຸ່ມປະຊາຊົນ ປະຕິວັດລາວ ຄົບຮອບ 66 ປີ, ທັງເປັນການປະຕິບັດຕາມແຜນນະໂຍບາຍຂອງພັກ ກໍຄຶແຜນພັດທະນາວຽກງານຂອງຊາວໜຸ່ມເມືອງພູວົງ ໃຫ້ໄດ້ຮັບຜົນສຳເລັດຕາມແຜນການທີ່ວາງໄວ້.
ການປຸກສ້າງເຮືອນຢູ່ໃຫ້ປະຊາຊົນຜູ້ທຸກຍາກອານາຖາ ຄັ້ງນີ້ ໄດ້ເລີ່ມຂື້ນໃນວັນທີ 5 ເມສາ 2021 ເຊິ່ງຊາວໜຸ່ມອາສາສະໝັກເມືອງພູວົງ ໄດ້ຮ່ວມກັນລົງມືປຸກສ້າງເຮືອນ ຈຳ ນວນ 2 ຫລັງ,ມີມູນຄ່າ 30 ກ່ວາລ້ານກີບ, ເປັນເຮືອນໄມ້ຊັ້ນດຽວ, ມຸງດ້ວຍສັງກະສີ, ຝາແອ້ມແປ້ນ ແລະ ປູພື້ນດ້ວຍແປ້ນ ໂດຍແມ່ນທຶນສົມທົບຈາກພໍ່ແມ່ປະຊາຊົນ,ນັກທຸລະກິດ, ຫ້າງຮ້ານ ແລະ ສະມາຊິກຊາວໜຸ່ມໃນທົ່ວແຂວງອັດຕະປື.
