ທ່ານ ວົງມະນີ ໄດ້ສະເໜີຂໍໃຫ້ ທ່ານ ປອ ຄຳແສນ ສີສະວົງ ຊ່ວຍເຫຼືອກໍ່ສ້າງຫໍພັກຍິງ-ຊາຍໃຫ້ແກ່ນັກຮຽນທີ່ທຸກຍາກຂາດເຂີນຢູ່ເມືອງ ນາແລ ແຂວງ ຫຼວງນ້ຳທາ ເຊິ່ງເປັນເມືອງທີ່ຫ່າງໄກສອກຫຼີກ ແລະ ຈັດຢູ່ໃນເມືອງທຸກຍາກຂອງແຂວງ ຫຼວງນ້ຳທາ, ຫຼັງຈາກ ທ່ານ ປອ ຄຳແສນ ສີສະວົງ ໄດ້ຮັບຂໍ້ມູນດັ່ງກ່າວກໍ່ຮີບຄົ້ນຄວ້າ ແລະ ເລີ່ມຈັດຕັ້ງລະດົມທຶນ, ເປີດຮັບບໍລິຈາກ ແລະ ໄດ້ມອບໃຫ້ໂຮງຮຽນ ນານາຊາດອົດສະຕາລີ
ເຊິ່ງເປັນໂຮງຮຽນສາຂາທີ່ຢູ່ໃນກຸ່ມການສຶກສາແສງສະຫວັນ ນຳພາໂດຍສະມາຊິກສະພານັກຮຽນ(ຕົວແທນບັນດານັກຮຽນ)ຈັດກິດຈະກຳລະດົມທຶນຕ່າງໆເຊັ່ນ: ຂາຍປີ້ຈັບສະຫຼາກ,ຈັດງານຕ່າງໆເພື່ອຂາຍປີ້ເຂົ້າງານ,ເປີດກ່ອງຮັບບໍລິຈາກຢູ່ພາຍໃນໂຮງຮຽນ,ຫຼິ້ນດົນຕີເປີດໝວກ ແລະ ກິດຈະກຳອື່ນໆອີກຫຼາຍຢ່າງ.
ນອກຈາກນີ້ຍັງມີການບໍລິຈາກວັດສະດຸການກໍ່ສ້າງ ແລະ ເງິນຈຳນວນໜຶ່ງຈາກບັນດາທ່ານຜູ້ປົກຄອງຫຼາຍຄອບຄົວ ລວມໄດ້ທັ້ງໝົດ110,000,000ລ້ານ ແລະ ອີກກວ່າ90,000,000ກີບແມ່ນທຶນບໍລິຈາກສ່ວນຕົວຈາກ ທ່ານ ປອ ຄໍາແສນ ສີສະວົງ ເພື່ອໃຫ້ງົບປະມານຂອງໂຄງການຫໍພັກ2ຫຼັງນີ້ໄດ້ຄົບຕາມກໍານົດເປົ້າໝາຍ.
ຈາກການລົງສຳຫຼວດຕົວຈິງຂອງ ທ່ານ ປອ ຄໍາແສນ ສີສະວົງ ໃນໄລຍະຜ່ານມາເຫັນວ່າໂຮງຮຽນທີ່ຫ່າງໄກສອກຫຼີກ ແລະ ຂາດເຂີນຢ່າງໜັກນັ້ນແມ່ນໂຮງຮຽນ ມ.ສ ໜອງຄຳ ຈຶ່ງໄດ້ເລືອກຊ່ວຍເຫຼືອໂຮງຮຽນດັ່ງກ່າວກ່ອນເປັນແຫ່ງທຳອິດຂອງເມືອງ, ໂຮງຮຽນດັ່ງກ່າວຕັ້ງຢູ່ບ້ານ ໜອງຄຳ ເມືອງ ນາແລ ແຂວງ ຫຼວງນ້ຳທາ.
ປັດຈຸບັນໂຄງການດັ່ງກ່າວໄດ້ເລີ່ມຕົ້ນຂັ້ນຕອນທຳອິດຂຶ້ນແລ້ວ ນັ້ນກໍ່ຄືໄດ້ສັ່ງວັດຖຸການກໍ່ສ້າງທັງໝົດໃຫ້ກັບທາງຄະນະຮັບຜິດຊອບໂຄງການຄືຫ້ອງການຊາວໜຸ່ມເມືອງ ນາແລ ເກັບຮັກສາໄວ້, ຄາດການລົງມືກໍ່ສ້າງຈະເລີ່ມຕົ້ນປະມານກາງເດືອນກຸມພາ 2021ນີ້.
